范太鍾情航運股

【明報專訊】前立法會主席范徐麗泰近期成為城中紅人，皆因大家都已經當佢加入咗參與明年特首選舉嘅跑馬仔。

范太上月忽然做咗中國遠洋（1919）獨立非執董，更引起大家諸多猜測。據港交所披露，於本周一佢又「小試牛刀」，增持5000股中遠，令個人於公司的持股達到1萬股。不過，小琴發現，范太似乎淨係對航運股情有獨鍾，喺佢出任獨立非執行董事的4間公司內，只持有中遠及中遠太平洋（1199）兩間公司股票。

任中遠獨立非執董 增持5000股

范太周一以每股7.118元購入中遠洋5000股股份，涉資3.56萬元。連同佢之前購入的5000股，佢現時總共持有中遠洋1萬股，以昨日收市價7.17元計，該批股份價值7.17萬元。

翻查紀錄，范太獲邀加入上市公司董事會已唔係首次，除咗中遠同中遠太平洋，佢亦被中國海外（0688）同中國神華（1088）分別於2009年9月及2010年6月，委任為獨立非執行董事。