塑化劑風波 匯源急撇清關係

【明報專訊】台灣的塑化劑風波引發兩岸三地飲品危機。內地的飲品公司更加係聞「塑」色變，紛紛跳出來澄清。好似一直強調自己產品唔加糖、添加劑同防腐劑的內地果汁業老大匯源果汁（1886），昨日就撇清關係，話產品不含塑化劑。

果汁飲品 內地人怕怕

匯源仲話自己的出品係經過國家權威部門檢測，可以放心飲用，但唔知係咪塑化劑風波鬧得太大，匯源同其他同行都唔肯透露自己產品的成分，包括添加劑來源及生產情况。可口可樂同百事可樂這些國際品牌更不在講，早已經發表聲明話自己的飲品全部合格。

雖然飲品企業急急澄清，但塑化劑風波似乎已經影響到內地消費者意欲，有內地媒體報道就話，部分市民唔敢買果汁，情願飲清水，就算買都會好仔細咁參詳瓶上列出的成分。至於已經被驗出部分果汁有添加塑化劑的台灣飲品企業統一集團，產品就更加係無人問津。

話時話，匯源今次都算唔多好運，上星期先至大玩「逆市降價」，宣布旗下八成產品降價，最高降幅更超過三成，當時有分析員估佢哋係想藉減價去谷銷售量，加速資金回籠，但家塑化劑風波之下，減價效應可能被抵消唔少。