新聞類別
財經
詳情#
【明報專訊】即將來港上市嘅意大利名牌Prada（1913）噚日舉行路演兼時裝表演，吸引好多城中名人出席，當中包括賭王四太梁安琪、財經事務及庫務局副局長梁鳳儀、李國寶大公子李民橋夫婦以及利豐老細馮國經等都有出席，當然亦唔少得Prada掌舵人Miuccia Prada同佢老公Patrizio Bertelli。
Prada近日傳出嘅招股價36.5至48元，好多人都覺得市盈率高達28倍好貴，有在場人士就問Miuccia點解Prada咁貴呀？Miuccia就以聽唔到為由無答到。
至於其他名人會唔會考慮認購呢？四太梁安琪就有點頭示意，李民橋就話會考慮下喎。
只容少數傳媒採訪時裝騷
在場所見，出席活動嘅女士們全部都好畀面，個個都帶住個Prada袋赴宴，得主人家好高興，而出席嘅人士亦有禮物拎番屋企，就係由一個白色Prada紙袋裝住，深啡色皮嘅文件袋，據知係畀男士放folder、文件等等嘅。雖然禮物係男裝文件袋，不過潮流興中性打扮，小琴都好想要一個！
身為一個女人，小琴都好鍾意Prada呢個品牌，自然希望可以知多啲呢個時裝表演詳情。不過小琴嘅傳媒朋友話，噚日Prada以及佢嘅公關公司「特別眷顧」少數媒體，大部分本港傳媒冇份睇。既然決心要變上市嘅公眾公司，Prada似乎要再開放一啲啦。
報料電郵﹕piano@mingpao.com
回應 (0)
