恒地歐肇基榮休 轉任非執董

【明報專訊】鄭海泉鄭大班上月榮休，佢喺恒生（0011）做大班時嘅上一手，轉去地產界發展嘅歐肇基亦宣布退休。恒基地產（0012）公布，歐肇基喺7月起退任首席財務總監一職，調任為非執行董事。

曾任恒生總裁 05年入恒地

歐肇基喺恒生係紅褲子出身，去到1993年正式升上副董事長兼行政總裁一職，到佢喺1998年離開恒生轉投新加坡華僑銀行，鄭海泉就正式由匯豐空降落恒生做鄭大班。

歐肇基2005年加入恒地，小琴聽講佢都幫四叔李兆基搞投資，無獨有偶，似乎個個恒生嘅前大班，都鍾意同大孖沙搞投資，好似2009年退休嘅柯清輝，之後就孖住馬時亨，搵埋城中富豪投資，將中策（0235）由一隻殼股，搞到幾乎蛇吞象式收購台灣南山人壽，所以話恒生嘅昔日大班對幫富豪搞投資真係有一手。

雖然調任非執董，歐肇基都有3年合約，每年收取董事袍金5萬元，佢亦係恒基陽光資產管理的主席及非執董，袍金為每年25萬元。截至去年底嘅財政年度，歐肇基一共支取薪酬達到1318萬元，唔會差過做銀行大班。