中策粉絲誓死守到底

【明報專訊】收購台灣南山人壽觸礁嘅中策集團（0235），好耐都未見有新發展，難為一眾高追嘅小股民，直到家都只可以死守。有長情小股民噚日去開完股東周年大會後同記者話，中策話事人馬時亨同柯清輝都係商界嘅大人物，喺中策「唔會唔搞嘢」，雖然現價同買入價差成幾倍，但都打算一直死守落去，等中策再有大刁推高股價喎！

呢班忠心嘅粉絲，有啲喺7毫子買，有啲摸頂挨近8、9毫子入貨，自從中策進軍台灣計劃幻滅後，佢嘅股價泡沫瞬即爆破，家跌到喺2毫子位置徘徊（圖），但一班小股東仍然死守，話要等副主席兼行政總裁柯清輝，同埋主席兼非執行董事馬時亨，再次聯手「搞大刁」！

不過依小琴睇嚟，一班小股東都仲要捱一段時間喇，因為柯大俠話，南山交易告吹之後，雖然好多投資銀行都向佢哋招手，介紹收購項目，公司亦自己研究咗多個收購機會，但到家佢未有心儀目標。佢話，屬意收購大中華區嘅金融服務項目，不過馬時亨忍唔住插嘴，話對台灣嘅機構興趣麻麻哋，睇嚟都係南山一役嘅後遺症。

南山陰霾 馬：對台企無興趣

柯大俠話，第時一有計劃進行收購，相信好大機會再喺市場集資喎。

報料電郵﹕piano@mingpao.com