港交所高規格 會電盈小股東

【明報專訊】電訊盈科（0008）大股東同小股東多年來嘅「恩怨情仇」近日有「昇華」迹象，皆因電盈話有啲小股東就公司分拆商業信託嘅計劃發表「涉及誹謗性的言論」，意味事件隨時會「升呢」到由法庭解決。面對電盈「紮行馬」，電盈小股東大聯盟感到非常無奈，但佢哋一班小股東獲得港交所（0388）「高規格」接待，總算可以搵番啲被尊重嘅感覺。

電盈小股東大聯盟發言人陳仲翔話，佢哋早幾日就電盈分拆呢單嘢約見港交所，短短幾日內已成功安排會議時間，陳仲翔噚日傍晚聯同5名代表去到港交所辦公室，先知接見佢哋嘅不是別人，正係上市科主管狄勤思，佢連同另外6名同事特登開OT同佢哋見面！

上市科主管接見 傾足70分鐘

陳生話個會足足開咗70分鐘，狄勤思不單坐足全場，仲親自回答每一條問題，並唔係坐喺度做樣。大聯盟代表當中有啲年紀比較大嘅股東，提問時有啲不着邊際，但陳生話狄勤思仍然好耐心聆聽，直頭好似保險經紀咁體貼！小股東好關注點解港交所對於電盈分拆「話唔批又批」，狄勤思就同佢哋解釋，話電盈最初喺分拆後公司資產值、同埋於商業信託嘅持股量都唔係好達標，後來電盈調整過個分拆議案，港交所至同意發出「不反對通知書」。

講真，小琴為咗呢單刁問過港交所不知幾多次，但都冇咁詳盡嘅回答，睇嚟呢班小股東確係獲得港交所厚待。陳仲翔表示非常感激港交所同埋狄勤思，願意同佢哋誠懇地溝通，希望其他機構可以此為榜樣，而佢哋已經釋出善意，希望喺今個禮拜五電盈股東會前，電盈管理層同聯盟代表會面，詳細講解吓分拆對股東帶嚟咩好處。至於電盈會唔會「釋出善意」，就真係要拭目以待喇。

報料電郵﹕piano@mingpao.com