呂志和父女 輕手減持銀娛

【明報專訊】小琴唔好賭，最多都係間中同啲女性朋友切磋吓國技麻將，但小琴對於賭股就好有興趣，因為濠江博彩收入個個月創新高，唔少芬佬同小琴講賭股追得過。不過，新項目開張無耐嘅銀河娛樂（0027），主席呂志和千金、銀娛執行董事呂慧瑜上個嚟拜就連續兩日減持咗70萬股，套現成1210萬元。

兩日減持套現1210萬

呂慧瑜喺今個月7號同8號減持公司股份，心水清嘅股民都記得，濠賭股早排係咁升，到美高梅中國（2282）在前一個周五掛牌嗰日就普遍回吐，銀娛亦喺前一個周四創新高升到上18.06蚊，至周五回落番啲，端午節過後又升過，呂慧瑜結果連續兩日喺場內以平均價16.94元同17.55元沽咗70萬股，個價算係相當唔錯。只係小琴諗唔明，當成條街都睇好澳門賭股，點解呂慧瑜會減持套現嗰「區區」千幾萬蚊呢？

聯交所資料又顯示，呂志和喺7號同8號作出相同申報，估計因為佢哋係關連人士，所以呂慧瑜減持，呂志和嘅持股量都下降，由原本嘅72.48%減至72.46%。