中科譯錯千億大刁嚇死人

【明報專訊】上市公司嘅公告及其他文件，向來以英文版本作準，但係作為一般散戶，或者好似小琴咁每日有好多個死線要趕嘅中文傳媒工作者，通常就依賴中文翻譯多啲。不過昨早中科礦業（0985）向嘉能可（0805）出售秘魯銅礦嘅公告，中文標題卻叫小琴嚇一大跳，寫住交易作價高達475億美元，計番港紙成3700幾億！

million譯做億 誇大咗百倍

咁大規模的買賣，唔係話無可能，但係就極之少見囉，如果係真，絕對可以做頭條故仔。為穩陣起見，小琴唯有用多些工夫睇英文原文，結果發覺原來正確作價應該係4.75億（475 millions）美元，相信應該係中文版譯者一時搞錯數字單位，錯將million（百萬）直接譯作億。

不出小琴所料，半個鐘頭後中科礦業（或者係港交所）也發現上述錯誤，於是再出番個改正的中文版公告。然而故仔到此仍然未完結，讓小琴又嚇出一身冷汗的係，午後竟然有數間網絡媒體，照引述中科礦業475億美元嘅公告！可見公司文件的翻譯質素有待提高之餘，行家們以後更要打起十二分精神，求快之餘不可忘記報道的準確性。