陳總飛莫斯科 Sell人民幣結算

【明報專訊】人民幣國際化全球關注，香港作為人民幣離岸中心，財金官員都擔大旗要向全球介紹香港嘅人民幣業務，好似金管局總裁陳德霖咁，都不時周圍飛去其他國家搞路演宣傳，啱啱佢就去咗俄羅斯同當地聯邦財政部副部長Sergey Storchak見面，聽講只係諗住坐一陣嘅副部長，最尾聽足兩個半鐘頭先離開呢！

小琴記得陳總周一先接待過國務院港澳辦主任王光亞參觀金管局，夜晚已飛去俄羅斯莫斯科喇，而且佢每度都係要招呼大人物，真係忙到甩轆呢！今次推介會吸引咗來自俄羅斯同東歐政府部門、金融機構同企業超過120個代表參加，聽講當地企業對於使用人民幣作為貿易結算貨幣都好感興趣，最關心係點樣減少匯兌風險同埋成本，亦好關心具體運作方法。