內地客17萬輕鬆買Hermes袋

【明報專訊】日本二手名牌店BRAND OFF香港第六家分店昨開幕，舖頭唔係好大，但係開喺寸金尺土嘅中環蘭桂坊威靈頓街口，與同業米蘭站（1150）隔街而望，唱起對台戲。昨雖不時落雨，小琴都喺現場睇到人頭攢動，開幕個半鐘便做成第一單生意，有內地豪客揀中一個標價18.8萬元的Hermes Birkin手袋，最後以17萬元成交。

梁先生一家三口嚟自北京，昨天正好經過BRAND OFF的新舖，順道逛了逛，披着豹紋紗巾的梁太太，一眼睇中咗Birkin袋，留短髮的女兒睇嚟都好在行，畀建議話應該買「今年最流行」的糖果色。綠色Birkin包包標價18.8萬元，一輪議價之後，以17萬元成交。梁先生感慨，太太和女兒都已經「有了很多包包」，「（太太）有了一個這樣的（Birkin），但不同顏色」。

梁先生十分健談，小琴同佢傾落，知道佢個寶貝女家喺美國讀高中，今次趁女兒放暑假舉家出遊，先到香港，之後去美國。梁先生本人在美國開投資公司，先前主要投資房地產和山西等地的煤礦（冇錯，又係房產同埋山西煤礦，內地兩大暴富行業），最近國家煤礦兼併重組，參股機會少咗，佢又有辦法轉而投資修路。

BRAND OFF 8月進軍上海

有鑑於內地同胞的驚人消費能力，BRAND OFF打算今年8月在上海開設首家內地專門店，未來3年更力爭將內地分店數目增加到100家。公司創辦人兼董事長安山勉告知小琴，每開一間舖，大概需要投入5億日圓（4825萬港元），主要用來買貨，為加緊擴張腳步，公司都打算學米蘭站，喺香港上市集資，不過暫時就未有詳細時間表。

安山勉說，BRAND OFF在行內出晒名收貨貴賣貨平，難免會令毛利有壓力。不過佢強調，咁做係為咗加快貨物嘅流通，公司希望本財年收入能有4至5億港元。

報料電郵﹕piano@mingpao.com