「恒天然」港發點心債

【明報專訊】內地毒奶事件令人心惶惶，加上日本核幅射泄漏之後，澳洲、新西蘭等其他國家嘅奶商個個都瞄準內地市場，好似新西蘭乳業恒天然（Fonterra）都要進一步搞大內地業務，仲利用香港作為平台發行點心債，實行喺香港吸夠水後返內地賣奶。

原來恒天然仲係第一隻新西蘭企業喺香港發點心債呢，今次發債籌集3億元人民幣資金，3年期息率只係1.1厘。企業對於人民幣產品嘅需求強勁，只要有點心債上場，即刻就可以畀市場吸納晒，所以債券息率就算一路落，一路都有人買貨，恒天然今次可以講得上係低價集資。

籌3億人仔 擴內地業務

管理層話，公司家喺內地嘅客戶群不斷增加，決定要攞定多啲人仔喺大陸擴展生意喎，公司喺河北省有一個自家牧場，確保牛奶嘅供應質素。小琴喺新西蘭都有飲過佢啲奶，唔知內地嘅出產口感又有無唔同呢？