耀才「頂爛市」 一周開足7日

【明報專訊】港交所（0388）推延長交易時段阻力重重，行政總裁李小加前日見記者立場更加有軟化迹象，不過耀才證券（1428）噚日就身體力行「撐」港交所，宣布即日起旗下7間特選分行會實施7天工作，淨係勞工假先休息， 個「延長工作時段」措施仲激過港交所！

其實家5天工作至係主流，耀才今次反其道而行，佢哋話延長分行服務時間都係顧客至上，方便啲客喺紅日到分行辦理開戶、查詢、交收及遞表抽新股等服務，從而提升客戶服務質素喎。耀才仲會畀客戶透過網上預約開戶服務，安排星期六下晝同星期日到分行辦理開戶手續，時間較以往更有彈性，有助吸納更多新戶。

港九新界7分店實施

7間「星期一做到星期七」嘅分行喺北角、觀塘、旺角、深水埗、大圍、大埔同元朗，即係港九新界都有。耀才今次打破業界傳統兼「頂爛市」，未知客戶受唔受落，不過李小加應該係最開心嗰位，因為終於有華資證券行認同佢，開門時間長啲生意都會多啲呢個理念。