渣打送上「8分鐘承諾」

【明報專訊】青春無價，小琴同好多香港人一樣最怕要等，等車、等食飯、等放工，全部都係小琴最憎嘅事，可能好多人都有同一諗法，所以渣打銀行就好識做咁推出8分鐘嘅服務承諾，即係話小琴如果要喺渣打呆等超過8分鐘，都未有櫃枱服務人員招呼，渣打就會向慈善機構捐錢。捐幾多？1蚊。冇錯，只係得1蚊。咁樣會唔會令客戶等得心甘情願一啲？小琴有啲保留。

員工一人一iPad

不過喺等待途中，渣打都會有啲前線服務人員，拎住部iPad好專業咁同小琴介紹最新推廣，聽講渣打仲係第一家銀行用iPad向客戶推銷。渣打香港個人銀行業務主管禤惠儀話，家大約三成前線銷售人員都係用iPad向客戶介紹，年底推展至全部前線都會一人一iPad，哈哈，Apple真係多得渣打呢個大客唔少，唔知渣打會唔會都要追住嚟換iPad 2，甚至第時嘅iPad 3呢？

香港員工有得用iPad，優越感格外多，不過渣打韓國員工就唔多高興，聽講有3000個員工，即係人手嘅一半，計劃喺周一進行罷工，因為佢哋不滿渣打韓國對員工薪酬進行改革。香港行政總裁洪丕正話，韓國好多機構都係採用年資計人工，但渣打想以先行者角色，落實按表現衡量，就係想激勵大家做好啲，佢話管理層將會同韓國員工再對話，希望早日回復正常辦公狀態。