香港航空 捲入外交風波？

【明報專訊】飛機除咗可以載人載貨，仲係一個好重要嘅政治工具，你見中美最高領導人開會前大陸總會閒閒哋買返幾十隻鐵鳥，就知佢嘅獨特功能。香港雖然作為祖國一部分，國泰（0293）、港龍買飛機一般都係純商業決定，唔似內地同業國航（0753）同東航（0670）等肩負政治任務。噚日路透社有單新聞，話由內地海南航空出任大股東嘅香港航空，原本想向空中巴士（Airbus）買10架A380，但因為阿爺中途攔阻，空巴咁就冇咗筆大生意。

路透社引述德國《商報》話，香港航空原本想用40億歐元買10架A380，但北京方面阻止咗單刁，以抗議歐盟計劃從明年起徵收航空碳稅，即飛進歐洲的各國航班都要畀稅。報道又引述德國工業界人士消息指，北京嘅威脅係千真萬確，因為航空碳稅計算基礎係06年至09年嘅二氧化碳氣體排放量，而09年大陸民航空中交通大量增長，所以中國覺得呢個計法對自己相當不利。

路透：北京唔畀買 抗議歐盟

小琴打畀空中巴士香港嘅靚女公關，佢話冇收過呢方面嘅消息。早幾日香港航空先話，希望增加A380嘅機種，喺長途航線上與國泰爭長短，家單刁做唔成，唔知香港航空有咩後着呢？