新聞類別
財經
詳情#
【明報專訊】新創建（0659）分拆嘅新礦資源（1231）噚日終於成功掛牌，通常喺大型新股上市儀式先現身嘅港交所（0388）行政總裁李小加都有畀面出席，算係「高規格」接待，偏偏人稱彤叔嘅新世界發展（0017）主席鄭裕彤同純官鄭家純都冇出現，浪費咗小加一番美意。
彤叔父子反而唔見影
小琴一介中女都出席過唔少上市儀式，印象中最高規格嘅係煲呔曾06年出席工行（1398）上市儀式，其他較巨型或比較有特色嘅新股，例如舊年嘅俄鋁（0486）、友邦（1299）同今年嘅Prada（1913），通常就係港交所主席夏佳理搭李小加，有時單拖有時雙劍合璧咁撐場。
相比之下，新礦資源集資額唔大，今次上市亦冇乜標誌性意義，能夠獲得小加捧場係有啲「特別」。港交所發言人就話，夏佳理又好李小加又好，管理層幾時出席上市儀式冇定律可言，主要係睇吓佢哋本身個schedule喎。不過小琴又發現，小加噚日喺上市儀式上講咗唔少嘢，尤其回應本地券商對進一步延長交易時段等措施的憂慮，唔通係小加有嘢想發表，所以借新礦個場一用？
回應 (0)
