網上群組聲討港交所

【明報專訊】港交所（0388）滿腹改革大計，但淨係個延長交易時段已搞到一班華資經紀怨聲載道，嚟緊再推隱名交易（即係股票機唔顯示證券行編號或名稱）、收窄股份買賣差價等，睇怕都會遇到唔少阻力。港交所行政總裁李小加早兩日喺公開場合「回帶」，話無懼延長交易時段惹爭議，社交網站facebook尋日即刻出現咗個「反對港交所不聽民意，強行實施新措施」嘅群組，仲貼咗一張有個紅色大交叉打喺小加個樣嘅大頭相，短短幾個鐘內有近60人「Like」咗。

有人留言鬧港交所「一味阿諛奉承歐美大鱷」，小琴就輾轉聯絡到其中一位「Like」咗個群組嘅證券界人士梁永祥，佢話雖然唔知邊個係群組發起人，但對於港交所呢啲改革簡直係「㷫過火屎」，好似延長交易時段咁，到家都冇人適應，而小加語氣一直都咁強硬，同政府之前強推替補機制不相伯仲！

除咗交易時段，隱名交易都好具爭議性，梁永祥話「冚牌」等如幫大戶隱藏行縱，港交所以降低交易成本之名，實際上係傾斜大戶喎。

梁永祥又話，其實華資經紀唔係要求港交所就晒佢哋，只係覺得交易所應該平衡各方利益，先係對成個市場最有利喎。

報料電郵﹕[email protected]