會計師公會 為民企伸冤

【明報專訊】大陸民企近排正宗被迫「趟渾水」，不論渾水研究有冇發表報告，只要有咩風吹草動，啲民企就畀人洗倉。咁又難怪，爆煲民企啲帳目真係好混亂，有啲造假手法更令人嘖嘖稱奇。

不過，香港會計師公會理事羅卓堅噚日亦為民企「伸冤」，對於好多民企喺美國以借殼形式上市，佢話傳統上投資者會覺得，如果係「乾淨企理」嘅公司應該循「正途」即係以IPO形式上市。但好多時民企都係聽從財務顧問嘅建議，如果財顧話美國借殼快啲或簡單啲，民企老闆根本唔知借殼以外有咩選擇，所以未必係佢哋刻意抄捷徑喎。

羅卓堅又話，香港喺借殼方面監管較嚴，所以愈來愈少公司借殼上市，而一般IPO審批亦較花旗國要求高，同一單刁香港聯交所問嘅問題比美國監管機構多好多亦詳細得多。

香港IPO審批要求更高

會計師公會個「2011年最佳企業管治資料披露大獎」噚日開始接受報名，小琴問呢排啲民企咁水深火熱，會唔會特別為民企設立一個獎，鼓勵民企做好啲企業管治？會計師公會副會長趙麗娟就話會研究吓，之但係好多民企老闆已揸香港身分證或其他地方護照，淨係點樣界定民企都要花時間諗諗。

報料電郵﹕[email protected]