恒生梁高美懿 獲傑出專業女性大獎

【明報專訊】喺香港講起首位華人大班，會即刻諗起退休冇耐嘅鄭海泉，而講起女大班亦別無他選，一定係恒生（0011）副董事長兼行政總裁梁高美懿。Margaret（梁高之洋名） 有幾犀利全中環都知，而「香港女工商及專業人員聯會」噚日再錦上添花，頒咗個「傑出專業女性大獎」畀佢。

恒指成分股中唯一女總裁

小琴每次見到Margaret永遠都係笑咪咪咁非常溫婉，加上身材嬌小，好難想像佢點樣喺呢個男性主導嘅金融界度殺出一條血路。但事實上Margaret喺職場的確係女強人一名，75年港大畢業，78年加入匯豐（0005），係首位出任行政級主管同埋喺總行返工嘅女性。85年帶住兩個女到澳洲做「開荒牛」，九十年代又領軍重整匯豐旺角區零售銀行業務架構，至05年升任匯豐首位華人女總經理，09年再升做恒生首位女行政總裁，仲係目前恒指成分股中唯一嘅女行政總裁添。

成日攞獎嘅Margaret就話，要平衡工作與家庭， 做到每個角色都稱職， 絕不簡單，希望呢個獎項可以鼓勵更多女性一展所長， 喺社會上發光發亮喎。