新聞類別
財經
詳情#
【明報專訊】網上近排盛傳一張「iPhone」照片得到中外傳媒爭相瘋轉，有咩咁特別呢？細心留意一下熒幕左上角，不難發現顯示「中國移動 3G」，憑呢幾隻字，有人估計呢部就係「TD制式iPhone初版」，相信蘋果已經準備好向中移動供貨？小琴專登向中移動（0941）打聽一吓，只可惜對方話，「關於推出iPhone，現時仍未有公布」，唔評論張相嘅真假。
中移動發言人同小琴講，「只能話我哋一直都有同蘋果傾關於iPhone嘅事，但我哋暫時都未有公布。」雖然呢張相得唔到官方證實，但中移動噚日照升1.7%，相當於中移動市值漲了250億元。
講番張相，相信好多用iPhone嘅讀者都知道，如果返內地用中移動網絡，係唔會出現「3G」字樣，事關iPhone係唔支援TD制式，最多只能用2.5G，呢樣細節成為咗證明呢張圖就係「TD制式iPhone初版」嘅最佳證明。
拒評相片真偽
但有網友睇個張相之後，都幾一面倒認為張相係假。有網友話，只要將部iPhone「越獄（即係Jailbreak）」之後，隨時可以改營運商個名。有網友講「中國移動」呢4隻字，點睇都有啲假假地，甚至質疑部機根本係一部山寨iPhone機？
股價升1.7% 市值漲250億
其實中移動出iPhone嘅新聞，年幾前也曾經成為熱話，但一直得個講字。至最近王建宙係股東會畀小股東批評公司股價低沉之後，他對發放iPhone嘅消息明顯比以前積極，先同蘋果高層見面，之後再同大家講述中移動iPhone用戶高達560萬戶，唔通今次中移動真係快將推出iPhone？
報料電郵﹕[email protected]
回應 (0)
