老潘「捧蛋」 妻轟京投地欠陽光

【明報專訊】話說小琴前日為大家報道過北京拍賣「中國最後的CBD（核心商業區）」地塊，結果已經揭曉！為3幅地叫出最高價的SOHO 中國（0410）最終一無所獲！噚日事件更有離奇進展，SOHO老細潘石屹稱接到恐嚇電話，某許姓先生由香港致電老潘要脅他停止在CBD事件上發言。而潘稱已向公安報案。

老潘接恐嚇電話 要脅停止發言

同樣曲折的情節是9幅CBD地塊噚日只成交8塊，「神仙地塊」流標。一眾內房商萬科和SOHO中國（0410）全數折戟而返，贏家係中信、中投、北京大學、三星等非房產商機構。中信獨家投標且報價與底價分毫不差的Z11地塊被潘石屹惡諷為「神仙地塊」，噚日卻按流標處理，理由只草草一句：投標文件違反《商業銀行法》。小琴遍問業內專家，無人解答到為何違法。

內房意見領袖任志強在中標結果公布後，喺微博上講：「悲催啊，拼了半天，小潘也沒啃上一塊骨頭，瞎搗蛋也沒你什麽份。」而SOHO大股東，潘石屹妻子張欣就發微博稱，報價最高卻不中標讓大家看到問題所在。她直言土地出讓一直係腐敗嘅集中地，「綜合評標」和「綜合評標委員會」更滋養咗呢類腐敗，土地出讓仲係要喺陽光下進行。

小琴心都矛盾，價錢係咪應該有決定性？綜合評標比起價高者得，更看重建築設計，企業品質和影響力。一個城市嘅命脈之地全部由發展商控制都唔係好事。綜合打分似乎可以避免好似香港咁披上地產霸權嘅惡名。不過，綜合評標實在太虛，得分幾多，理據何在都應公開，做到讓人心服口服先得。