陳裕光年報吐苦水

【明報專訊】大家樂（0341）舊年業績麻麻哋，加上因為最低工資搞到滿城風雨，令到身為主席嘅陳裕光認真頭痕。陳裕光公布舊年業績時，同時宣布出年3月退休。噚日面世嘅大家樂年報，有陳裕光嘅最後一份「主席心聲」，喺入面陳主席大吐苦水，話上年捲入咗一場「始料不及的公眾爭議中，理性的商業決定不幸地被套上政治色彩。」

睇嚟陳裕光對於最低工資帶來「無良顧主」嘅指控，仲係好耿耿於懷喎。

最低工資事件 被指無良顧主

喺大家樂上一個財政年度嘅年報，陳裕光話上年係集團有史以來最具挑戰及爭議性嘅一年，無論喺公司業務、企業形象或者民生議題，都要面對從四方八面而來嘅挑戰，真係一時難以言喻咁話。起初佢都係話舊年通脹嚴重，搞到集團毛利率下跌，不過講講吓，就忍唔住呻吓，話上年最低工資立法嘅時候，集團以漸進方式提早配合，明明係理性嘅商業決定，但就不幸地被套上政治色彩喎。

大家樂舊年率先扣員工飯鐘錢，一度引發全港罷食風波，喺全城圍插下，大家樂最後決定員工可加薪兼享飯鐘休息日有薪，不過陳裕光就話大家樂隨時因為最低工資而要發盈警。

不過，陳裕光呻還呻，最後喺年報度都話，身為臨時最低工資委員會委員，最低工資雖然對所有以普羅大眾為對象嘅零售行業，可能會帶嚟沉重成本負擔，但呢個係社會公義同埋商業持續發展必須付出嘅代價咁話。

報料電郵﹕[email protected]