傳購倫交所 港交所懶得澄清

【明報專訊】港交所（0388）「貴」為全球最高市盈率交易所，間唔中就畀人傳佢想收購同業，英國《獨立報》周三又有篇報道，引述當地交易員間流傳嘅市場消息，話港交所有意出價每股15英鎊以上，收購倫敦交易所，仲話此舉已經得到北京嘅祝福喎。

呢個作價比起倫交所當日收市價有成五成溢價，消息出街後，倫交所股價即時有反應，最多升過4%。但喺地球另一邊嘅港交所，股價冇乜反應之餘，發言人亦例牌話唔評論市場傳聞。

不過就有口痕友話，港交所點解唔以身作則，出番個通告澄清呢？發言人話，一來市場上久不久就有呢亭傳言，加上股價冇異動，冇可能次次都走去澄清。總而言之，港交所如果有嘢要公布，自然會公告天下架喇。

事實上，港交所今年2月，即係環球各大小交易所「玩合併」潮嗰陣已經出過一次通告，話冇任何有關收購或變賣嘅商談或協議，又話若然尋求聯盟，都必須同港交所專注大中華市場嘅方向一致。市場人士都話，由倫交所同多倫多交易所，以至新加坡交易所同澳洲交易所嘅「姻緣」都無法修成正果看來，話港交所喺呢個時候出手收購倫交所，真係得啖笑居多。