聯通發射站扮樹 居民發火

【明報專訊】內地成日強調綠化環境，勢估唔到聯通（0762）會咁積極響應。事關小琴昨日上內地網上討論區，見到有重慶嘅市民發帖投訴，話聯通響未通知當地一個住宅區居民嘅情况下，偷偷地響區內起左個發射站，為掩人耳目，竟然將發射站扮成棵樹咁款。

個市民仲好細心咁將呢條「樹型發射站」影相為證，照片上可見，係一片綠化帶入面，零零舍舍有棵參天巨木，不過枝葉就唔係幾茂盛，有少少發育不良咁。

但近鏡睇真啲，咦！點解樹幹會突出一啲好似天線咁嘅物體？再細心望吓，樹枝用繩綁住嘅係乜？「樹幹」外層仲全部用油漆成樹皮狀，原來真係發射站扮樹喎。

被指收天價租金 冇通知居民

發帖嗰位市民好勞氣咁話，聯通同住宅區嘅物業管理公司冇事先通知業主，就偷偷起咗呢個發射站，無視業主權益，亦擔心發射站嘅輻射會影響健康。仲有市民話，因為要響住宅區建發射站，開發商會問電訊營運商收取高價租金，每平方米嘅租金隨時仲貴過租樓，所以電訊營運商先想到「扮樹掩飾」此招來應對，節省不必要開支。

不過，亦有市民持不同意見，指所謂開發商收取天價租金係胡說八道，將發射站裝扮成樹木，亦只係為了美化住宅區環境，談不上什麼掩飾。

居民雙方各執一詞，香港聯通嗰邊就同小琴講，要問返總部了解件事先。至於大家覺得聯通發射站係扮樹遮掩定係美化環境，套用鐵道部發言人金句，「信不信由你，反正我信了」。對於點解個發射站起好咗先畀人發現，「這是個奇蹟，它就是發生了。」

報料電郵﹕[email protected]