任總搞講座 5日盛惠9萬

【明報專訊】任志剛離開金管局總裁呢個位就嚟兩年，但呢位被外界尊稱為「任總」嘅前中央銀行家，又做人民銀行顧問，又喺中文大學講書，真係退而不休。近日小琴收到一份來自中大全球經濟及金融研究所嘅邀請函，預告「任總」又將出場，喺該機構9月下旬舉辦嘅「環球金融行政領袖計劃」論壇中擔任嘉賓主持，訪問三名諾貝爾經濟學獎得主。

陣容鼎盛 3諾獎經濟學家撐場

根據小琴了解，要參加中大今次呢個活動，短短5日就要收成9萬銀！點解咁貴？因為活動不僅請咗Sir James A. Mirrlees、Myron Scholes及被譽為「歐元之父」嘅蒙代爾（Robert A. Mundell）三名諾獎得主，闡述各自對全球貨幣及金融市場嘅觀點，仲有中大前任校長劉遵義、港交所（0388）主席夏佳理、港鐵（0066）行政總裁周松崗、利豐（0494）主席馮國經、立法會議員方剛等商界人士，亦將客串不同場次嘅講座嘉賓，分享業界嘅經驗，可謂粒粒皆星。

咁多猛人雲集，小琴覺得代價比較不菲，都唔係唔合理嘅。况且今次主辦方係中大，唔似科技大學之前搞嘅「校長論壇」，雖然都請咗舊年諾貝爾經濟學獎得主Christopher Pissarides，但因為有上市公司俄鋁（0486）嘅贊助，費用就全免啦。今次值唔值得比成9萬蚊，都係留返讀者自行判斷啦。

報料電郵﹕[email protected]