神華陳必亭 重出江湖助糖王

【明報專訊】小琴聽聞，66歲嘅前神華集團董事長陳必亭重出江湖，而且仲係下海，幫私人公司打江山。陳總將會幫有「糖王」之稱嘅郭鶴年，出任益海嘉里嘅董事長。益海嘉里係家內地最大嘅糧油企業，同巨頭中糧集團係同一個級數，金龍魚就係佢嘅品牌。

出任糧油商益海嘉里董事長

隔行如隔山，陳總搞開煤炭，點解會出任糧油公司嘅董事長呢？原來為官之道，一通百通。小琴google一下，陳總之前一路官運亨通，做到江蘇省副省長。2000年先加入神華集團，任董事長，兼任黨組書記。

喺佢執掌之下，神華07年重返A股，股價一飛冲天，一度升至近百元人仔。隨後金融危機來襲，神華股價垂直降落，跌破20元。2008年12月底，陳必亭辭職退休，外界揣測與A股股價關係密切，唔少投資者鬧佢搵時機套殺散戶啲錢。

小琴心諗，今次糖王再請佢出山，必定係睇中佢政商兩界的人脈資源。市場都有傳聞，呢間益海嘉里準備喺中國內地上市，如果係咁，唔知糖王係唔係期望陳總再上演一齣股價飛升嘅「中國神話」呢？