李小加hurt盡報紙記者心

【明報專訊】港交所（0388）派成績表日被黑客以攻擊佢嘅「披露易」網站「贈興」，結果仲搞出3大藍籌加400幾隻窩輪牛熊證「世紀停牌」呢個軒然大波，原本喺周三業績會上已經就事件解畫嘅行政總裁李小加，噚日再出來見傳媒跟進事件。

喺超過一個鐘頭嘅記者會入面，小加總裁一直耐心解釋港交所管理層喺周三嘅心路歷程，同埋講嚟緊有咩對策。

有記者問佢會唔會還原基本步，要求上市公司登報發放公司公告。小加總裁聞言，諗都唔諗咁答（普通話讀出）：「都什麼時代了，今天大家都在上微博，還有多少人看報紙呢？還要是報紙的廣告！」，話呢個做法行唔通。

拒上市公司報章發公告

雖然家人人手上一部智能電話，不過收費報紙連埋免費報紙，每日閒閒地發行幾百萬份，唔知小加總裁又認為幾百份萬報紙係邊個睇㗎呢？况且小加總裁發言時，在場好多都係報界嘅記者，佢咁講都真係幾hurt。喺小加總裁隔離嘅港交所人民幣產品專責小組主管陳秉強就補充，話報紙每日只能出一次，又只係隔夜消息，冇辦法發放即時消息，的確唔係咁適合喎。

報料電郵﹕[email protected]