數碼通豪買iPad 幫顧客買機上台

【明報專訊】舊年業績好好嘅數碼通（0315）又有新搞作，噚日喺開幕嘅IFC新店用咗一套無線系統，以後店員可以用iPad、iPhone幫你落單，真係連排隊上台都可以慳番。黎大鈞仲話，為咗係全線分店用呢套系統，買入好多部iPad，預計總共要使幾千萬咁話，全係為客戶有更好體驗，認真豪氣。

噚日數碼通喺中環IFC商場嘅新舖開幕，數碼通行政總裁黎大鈞就帶傳媒參觀一吓間舖嘅秘密武器，就係全亞洲第一個採用由VeriFone及Global Payments提供的最新信用卡付款器（見圖），配合iPhone無線操作，用已加密的數據提供HSPA網絡傳輸資料畀總機。成套系統畀職員可以一面用iPad同你介紹新產品，另一面又可以用iPhone隨時喺店內任何地方一次過做晒上台買機嘅交易，呢項新技術將於會喺數碼通全線門市陸續採用。

無意今年推4G 唔搵客做白老鼠

另外，今年CSL已經推出咗有4G之稱嘅LTE服務，標榜上網速度比3G快得多嘅LTE，由於現時未有手機可以行，暫時都只有畀手提電腦上網嘅USB 流動數據器，其他電訊商好似和電香港（0215）旗下3香港及電盈（0008），都聽講會係年底推出LTE服務。一向有個性的黎大鈞就話，家吓LTE手機未普及，無意思要喺今年推LTE，佢又質疑其實LTE實際營運都無咁快，「無謂搵啲客做白老鼠」。