黃遠輝告別工銀7年情

【明報專訊】銀行界傳媒之友黃遠輝，做埋今個月，就正式結束同工銀亞洲嘅7年賓主情，聽講佢一早已經同公司單聲，等公司可以及早搵到接班人，黃總家嘅職責未來仲會一開三，將來由3位不同嘅同事負責，可見佢本來嘅工作，係幾咁重要。

未定新路向 可能進修吓

洋名Stanley嘅黃遠輝，2004年由渣打轉投工銀，擔任董事兼副總經理，佢話今次唔撈，主要係想做返啲有興趣嘅事，莫非已做厭銀行界？非也非也，佢話，銀行界都係自己嘅興趣之一，未來都會繼續留意業界嘅事。唔做銀行界做乜好？星展前一姐葉約德，以及前上商副總經理陳鳳翔無做銀行後都去搞基金搵真銀，莫非Stanley都打算向呢條路進發？佢笑稱話目前都未決定新去向，可能會先進修一吓，聽聞佢對考古同畫國畫都甚有興趣，話想再深入研究一吓喎。Stanley喺業內出名瓣瓣掂，話唔埋好快就被其他公司招手，無耐又再同各位傳媒朋友見面呢！