中銀人幣發展 快港交所九條街？

【明報專訊】噚日喺一論壇上，香港幾個財金猛人齊齊討論人民幣國際化嘅進程，其中主持人以車速每小時120公里作為上限，問一班猛人覺得家人民幣發展速度幾快時，中銀香港（2388）副董事長兼總裁和廣北話踩緊100公里，但港交所（0388）行政總裁李小加就認為只得10公里，難道和總覺得中銀嘅人民幣業務發展，足足拋離慢吞吞嘅港交所九條街？何解有咁大分別呢？

港交所到底對於人民幣股票、人民幣資金池（即係TSF）係咪進展得太慢，認真見仁見智，小加覺得，家只係踩得嗰10公里，係因為人民幣國際化同跑馬拉松一樣有排跑，所以一定要慢慢咁去。中銀和總就覺得，如果法定係120公里，佢踩緊100公里實際上係有點慢喎，不過小琴覺得，中銀作為人民幣業務獨家清算行，人民幣業務嘅發展比起其他銀行，已經有先天性嘅領先，嚟緊會否繼續帶頭，就要睇中央意願喇。

被問發展溫度 和總反應大

轉過頭主持人又問，家人民幣發展嘅溫度，是冷是熱。和總一聽到呢個問題就顯得有啲不耐煩，因為一諗起「熱」，大家就會聯想到係「熱炒」，今次論壇搞手係央視，仲記得佢上年底整咗篇香港囤積人民幣炒作升值嘅報道，就搞到滿城風雨，連金管局陳德霖率領銀公團隊上京時，都要就此向京官解畫。所以可以理解和總對呢個問題點解咁大反應，佢同小加最尾分別話係合適同埋最佳溫度，相信係中央最滿意嘅答案喇啩。