證監呼籲市民 幫手捉大鱷

【明報專訊】證監會執法向來以嚴厲著稱，但本事再大，都有鞭長莫及嘅時刻。證監會昨日就相當罕有咁，喺官方網站刊載7名人士嘅基本資料及相片，呼籲市民幫手搵佢哋嘅行蹤，成個公告似足《警訊》嘅通緝公告，唯一唔同嘅係證監會冇懸賞捉人。

東區裁判法院曾對其中嘅3人發出逮捕令，分別為曾出任中盈國金資源（0766，前稱中盈控股）執行董事嘅唐彥田、創業板公司世大控股（8003）前副總裁潘彩虹，同之前係匯富環球基金管理投資總監嘅梅曉東。

3人出庭應訊前已離港

以上3人均涉嫌觸犯《證券及期貨條例》，但佢地係出庭應訊之前，已離開香港。根據證監會披露，唐彥田和梅曉東分別係美國同澳洲籍，潘彩虹就來自內地，但證監會相信，佢地現在應該全部係內地喎。

小琴翻查資料，證監會指控唐彥田涉嫌四項內幕交易罪，包括2007年喺中國科技（0985，現已更名為中科礦業）未公布嘅股價敏感消息前，偷步買賣公司股份。潘彩虹就涉嫌係出任世大控股副總裁期間，喺公司配售前數天沽貨，以避免損失。

梅曉東就被指喺2008年3至4月期間，托高私人持有嘅彩虹電子及中國航空技術（0232，現稱中國航空工業）股價後，再用佢管理嘅基金接貨。

除咗以上3人，證監噚日仲呼籲市場幫手尋找曾任第一天然食品（1076，已進入臨時清盤程序）嘅三名董事楊宗龍、楊樂、倪朝鵬，以及東方明珠創業（前稱招商迪辰 ）嘅前主席兼總裁范棣協助調查。

email:piano@mingpao.com