內房冰河期 美女售樓員人工縮九成

【明報專訊】內地樓市蕭條唔止地產商頭痛，相關行業亦都唔好景，好似早幾年賺到盤滿鉢滿嘅售樓員咁，家銷情低迷下，都只可以勒緊褲頭。

好似其中一個樓市遇冷嘅大城市上海咁，當地一個金牌售樓姐姐就感受到呢一股寒意。呢位姓顧嘅售樓姐姐原本喺銀行打工，2年前跳槽到一間地產商，喺售樓處賣樓，佢入行果陣，內地樓市正值繁榮期，所以佢平均每個月都能夠賣出20個單位左右，以每個單位均價135萬元計，售樓姐姐當時每個月佣金閒閒地都有3、4萬，好過唔少專業人士，都咪話唔和味。

但係好景不常，今年以來，上海地產市道愈來愈差，一方面有限購令，另一方面買家亦都觀望等跌價，唔少樓盤一個月先得個位數嘅成交量，但售樓處又唔可以減太多人手令場面冷清趕客，僧多粥少，收入自然大減。

旺市月賺4萬現僅4千

好似金牌售樓姐姐咁，呢排佢每個月最多只係賣到2、3個單位，如果仍然按照每個單位均價135萬嚟計，佢家每個月佣金得番3、4千蚊上下，比起高峰期3、4萬蚊，足足少左成九成。小琴問大家，如果要你家減薪九成，你可以點生活呢？

有深圳嘅地產代理大佬就同小琴講，呢一年嚟都有唔少地產經紀因為冇單開而流失，咁當然喺市道唔好時，呢種流失可以理解成汰弱留強，但呢位大佬都擔心，個市再差落去，可能連強嘅經紀都會頂唔順而求去。