新聞類別
財經
詳情#
【明報專訊】股神巴菲特話「水退便知誰在裸泳」，每當市况唔好，好多上市公司股東抵押股份嘅消息就會曝光，皆因好多股份畀人斬咗倉，股權過戶要上報港交所（0388）是也。
深圳地產商鴻隆控股（1383），之前第二大股東趙銘，因為欠債要強制出售抵押股份畀澳門賭廳廳主周焯華；噚日港交所個網頁又顯示，由前主席兼大股東曾雲樞持有嘅近3.2億股股份，上星期四喺場外過咗畀蘇淑娥，批股份佔鴻隆26%股本，作價每股0.41元以此計算，成批股份約值1.31億元。
第二大股東趙銘 遭遇相似
其實曾雲樞早喺舊年10月，已經將呢批股份抵押咗畀由蘇淑娥持有嘅Green Auspice，至上個禮拜以今年最低價嘅0.41元轉手，相信係被斬倉。小琴幾年前同曾雲樞有一面之緣，諗住打畀曾生求證吓，之但係佢公司個電話長期打唔通，小琴唯有試圖以有限線索搵答案。
鴻隆呢位新鮮熱辣出爐嘅大股東蘇淑娥相當神秘，網上關於佢嘅資料少之又少，小琴只能夠喺澳門政府機關通告入面，發現一位中英文名都同蘇淑娥相同嘅人士，佢係從事保險業嘅。咦？又係澳門人？上次接手趙銘批股份嘅周焯華，既係澳門賭廳廳主亦係太陽國際（ 8029）主席（即係接受趙銘押股嗰間財務公司），佢今年9月入咗鴻隆個board之後，就委任咗6個太陽國際嘅人入局，本月初又坐埋鴻隆主席個位，如果呢位蘇淑娥真係澳門人，唔知係咪同周焯華有淵緣呢？
email:piano@mingpao.com
回應 (0)
