渾水「癱咗」 仍不忘踩分眾

【明報專訊】正所謂「出得嚟行，預咗要還」，成日針對中資股之沽空機構渾水研究（Muddy Waters），呢鋪可能上得山多終遇虎，前日先發表報告，話紐約掛牌嘅中資公司分眾傳媒涉嫌欺詐，噚日網站就畀黑客入侵。

雖然網站被黑，但係渾水然唔放過分眾，仲要響頁面上寫「我哋網站遭到黑客攻擊，將盡快回復正常運行。我哋對分眾傳媒嘅評級依舊係強烈沽出。祝大家感恩節快樂。」

大家關心呢件事，因為時間實在太巧合，前日渾水份報告就指摘分眾傳媒虛報液晶廣告電視數量，導致分眾傳媒股價大跌；分眾立即反駁，老闆江南春直頭話係有心人為做空而放出謠言。但發展到家，小琴比較關心嘅反而係，究竟係咩人「黑咗」渾水？動機何在？

復星力撐分眾 斥逾8000萬增持

呢一邊渾水畀人搞，另一邊持有分眾嘅其中一個股東復星國際（0656），噚日就公布已動用超過8000萬增持分眾股份，以示全力支持，增持之後，復星手上總共揸住16.42%分眾股份。事實上，復星呢鋪真係要同舟共濟，事關佢自己嘅股價，響前日渾水插分眾之後跌近7%，噚日亦都再跌1%。

講真，「渾水魔咒」咪話講笑，你睇隻加拿大上市嘅嘉漢林業6月畀佢搞到一鑊泡，直至最近獨立調查成功「洗底」先至有望翻身；仲有隻雨潤（1068），只不過係畀人傳渾水會搞佢（事實上係無搞到嘅），就已經引發恐慌性拋售，所以你話，呢趟渾水，直情掂下都唔得。

email:piano@mingpao.com