萬科抱佛腳 搵方丈幫賣樓

【明報專訊】內地樓市進入寒冬，開發商為求散貨，惟有奇招百出。小琴聽聞內房龍頭老大萬科邀請歸元寺方丈隆印法師為樓盤祈福，並免費送一次超渡喔，果然吸引咗諸多善男信女。之不過，真正出手買樓嘅人並不多。

歸元寺是武漢名剎，建於清順治年間，歷史都幾久遠。不過，呢位隆印法師卻頗為現代，緊貼時事。先前，佢開通微博，弘揚佛法。今次又再出山，為岌岌可危嘅內地樓市發功。

家內地買房送家具、送裝修、送汽車已經唔再新鮮，樓盤滯銷之下，唯有怪招、奇招、辣招，先可以搶到客源。隆印法師喺武漢都幾有號召力，萬科當地樓盤「漢陽國際」用呢條橋的而確之吸引到好多信眾捧場。之不過，大家祈禱緊啲乜嘢呢？會唔會係樓價大降三成，萬科虧本銷售呢？

售樓現場所見，方丈隆印法師唔單只帶領民眾企喺禮台上面，燒香禮佛，仲即時為佢哋摸頂祈福。遁入空門的大師出馬促銷樓盤，內地網友一語中的：「房市不給力，萬科抱佛腳」。