馬化騰科大攞獎 封嘴快閃

【明報專訊】騰訊（0700）自從公布中期業績倒退後，股價一直弱過藥煲。不過，早排大市好波動嗰陣，佢啲股價就奇奇怪怪。市升就好似企鵝跳水咁插落去，市跌反而無啦啦升番上去。小琴問過啲市場人士，個個都諗唔明係咩事幹。

昨日，見科大頒個「創新科技工程大獎」畀騰訊主席馬化騰，當然要「踩場」問過究竟啦。路邊社透露，馬化騰不知幾緊張個獎，前晚已經到咗香港準備攞獎。既然得獎，少不免要講吓得獎感受。佢話感謝科大，仲細數當年創業艱辛。

話說騰訊係第一間科網公司，用QQ嚟做生意骨幹。「要不賣掉，要不死掉」馬化騰話，當時好多人都唔睇好，但最後佢地都成功咗，仲成為間過千億市值嘅上市公司㖭。可惜，攞完獎之後，馬生急急腳咁走，問佢股價、發優先票據等等，統統封嘴唔答，結果白行一趟。