季績差 沽神道歉唔認錯

【明報專訊】阿爺噚晚突然宣布減RRR（存款準備金率），相信對一潭死水嘅金魚缸有番多少刺激，不過小琴近排不論同芬佬或Trader傾偈，佢哋都牙痛咁聲，皆因今年股市疲弱，年尾花紅怕且都係聊勝於無。小琴對於呢班中環精英深表同情，之但係遠在華爾街嘅「神級」基金經理「沽神」保爾森（John Paulson）都要為旗下基金表現不濟向投資者道歉，證明今年對芬佬嚟講的確係艱難嘅一年。

保爾森喺The Paulson Funds嘅第3季報告度承認，今年第3季係公司成立17年以嚟，表現最差嘅一季，管理層為此感到失望，並向投資者致歉。保爾森又話，公司已汲取2011年嘅經驗，將會致力回報投資者，誓要令旗下基金跑贏大市咁話。

賴大圍悲觀恐慌

雖然沽神向投資者道歉，但對於旗下基金表現不濟，保爾森就歸咎於市場瀰漫悲觀情緒，即使佢投資嘅大部分公司喺今年第2季有優秀表現，股價都因為投資者恐慌性拋售而下跌。為咗證明呢個史上最差季績係非戰之罪，保爾森又指出標普500指數今年第3季跌咗14.3%，今年頭9個月計更由升5%轉為跌11.4%喎。

沽神向投資者派定心丸，話現時係大圍恐慌而非公司基本因素左右市場，相信佢基金嘅投資喺市場恐慌情緒消散後，會回復好表現。事實係咪咁，就要拭目以待嘞。