郭樹清勸告 低收入人士咪炒股

【明報專訊】新上任嘅中國證監會主席郭樹清呢排頻頻出手整頓證券市場，噚日佢仲開口話，資本市場要健康安全，唔單止需要有效同透明嘅市場機制同監管，仲要有一班成熟理性嘅投資者，所以佢認為，低收入人士同退休人士就唔多適合玩股票，建議佢哋不如考慮下其他低風險投資。

小琴仲記得，金融海嘯未出現之前，內地曾經出現過「全民炒股」嘅瘋狂現象；當時一夜暴富嘅吸引力，令到上至老人家，下至中學生，只要有少少錢都會投身入股市，但幾年過去，能暴富者又有幾多？

早兩個月，內地網上流行一首改編嘅《小股民之歌》，一句「在那山的那邊海的那邊，有一群小股民，他們辛勤又努力，他們選股又割肉，他們不論何時上班下班都在看信息」，道盡內地股民面對股市新低再新低嘅痛苦與無奈。

計我話，點只低收入人士同退休人士，基本上股市就唔係人人玩得起。