最貴紅酒港拍賣 1支盛惠10幾萬

【明報專訊】名酒拍賣行Acker Merrall % Condit今個月8號同10號要喺香港開兩場拍賣會，其中有個珍藏Romanee Conti系列，共55支酒，估價去到480萬至640萬港紙，計落一支要成十幾萬。行政總裁John Kapon話，呢次好多酒都係空前絕後咁罕見，不單止出身顯赫，仲有難得酒款集齊一系列幾十年出品，認真巴閉！


但係啲酒咁貴，邊個會走來買呢？阿John就話，幾年前最主要客人都來自歐美，但呢兩三年中國客戶忽然增加，估計已經佔全球市場60%，小琴聽到都嚇一跳。中國人咁捧場，唔怪之得Acker喺香港拍賣會場數，由08年每年兩場已經上升到最近兩年每年有六場啦！睇來真係愈來愈多中國富豪可以輕鬆坐擁稀世紅酒啦。


小琴仲特登問過行家，雖然好多紅酒目前有升值空間，不過原來好多有錢人買天價紅酒真係純粹為一飽口福，投資都冇睇得咁緊要。小琴平時飲開百佳百零蚊兩支嗰啲紅酒都要預先做好budget，唔知啲買咗飲完一支十萬蚊紅酒之後會係咩心情呢？