周松崗榮休 「超人」父子撐場

【明報專訊】噚日傍晚喺馬會快活谷看台包廂，港鐵公司為行政總裁周松崗搞咗個榮休酒會，兼歡迎新總裁韋達誠履新，現場星光熠熠，仲勁過特首參選人嘅造勢活動，「超人」李嘉誠同「小超人」李澤鉅親自到賀；局長級人馬就有鄭汝樺、林鄭月娥、周一嶽、李少光，已經辭職參選特首嘅前政務司長唐英年亦有到，但就唔見佢對手振英哥嘅身影。
酒會上，有政府中人發口痕話，港鐵已經變咗全港最大嘅住宅土地供應商，地產界大佬當然要畀面，超人父子同到賀，一啲唔奇怪。唐英年同忠實支持者盛智文、林健鋒喺酒會滿場飛，非常受歡迎，反映在港鐵呢個親建制圈子，挺唐系真係頗為一面倒。港鐵主席錢果豐致辭時話，周松崗最令人難忘，係不論幾困難都笑得出，笑聲大到穿牆過壁，至於新總裁韋達誠，錢果豐話佢身高6呎6，要著13號鞋，而周松崗留下嘅「鞋」（指足印，寓意成就）夠晒大，絕對夠晒韋達誠著咁話。