明報記者突圍 奪花旗新聞獎

【明報專訊】小琴平日講得財經故事多，今日暫且休兵，同大家分享吓開心事。事緣小琴老友記，明報經濟版之靚女記者劉欣欣，平時辛勤筆耕屢有佳作，早得業界認同，昨日更喜獲嘉許，勇奪「花旗集團傑出財經新聞獎2012」亞軍。小琴作為同事，都與有榮焉。


贏得花旗呢個新聞獎，真係要有過五關斬六將之真功夫先得，據評判之一、商務及經濟發展局前局長馬時亨講，花旗方面從數十份參賽作品篩選剩26份畀過一眾評判點評，然後再從26份入選佳作中，評出冠亞季軍，其間一眾評判仲要互相討論，可謂相當嚴格。


財經界重量級人馬當評判

睇返個評審名單，包括浸大商學院院長張仁良、數碼港董事局主席周文耀、城市電訊（1137）主席王維基、德昌電機（0179）主席汪穗中同埋前述之馬時亨，位位都係財經界之重量級人馬。經過眾猛人金睛火眼挑選，呢個獎真係分量十足。所以小琴都有同老友記欣欣講，奪得呢個獎，矜貴處唔係個幾千元獎金，而係精英前輩之肯定，相當難得也。


當然，既然亞軍獎金有成6000大元，向來內向的小琴都盛情難卻，決定接受欣欣豪「擦」一頓之邀請。小琴仲聽聞，明報老總對獲獎亦深感興奮，話要請食慶功飯