七級偽術：一條標題　衝出國際

【蘋果日報】有人說記者最最不該錯，因為普通市民沒有你多門路，傾向相信你，若你有意無意誤導群眾，就是自毀專業長城。是以不可低估自己影響力，必須謹守崗位，萬勿大膽假設不求證，遇有疑問，務必複核再複核，記着你的外號叫「無冕皇帝」。
但我會說公關更加不許錯，傳媒靠你提供資訊，了解貴公司使命、策略和業務；公司依賴你妙筆生花，把品牌故事說好，提昇形象，揚善隱瑕，反正沒有人全對，也沒有人全好，但準確性就很重要，事實都搞錯，是未做好宣傳先弄出公關災難。
平日，細細碎碎的閃失，公關記者都犯唔少，不過應該無人會如英國地區報《Cambridge News》上周咁大鑊。
上周，呢份唔講冇乜人識的小報紙，居然犯錯在頭版的頭條古仔。係，的確是頭版和頭條，是大到無倫的題，而且不是串錯一粒字母，而係全條題根本是無厘頭的「100PT SPLASH HEADING HERE」（呢度放100point超巨標題）。估計九成係layout上預了位，但標題未起好，設計師寫定喺度提醒編輯，點知就咁印咗出街！嘩，錯成咁，唔係一個人，係成team人鬼掩眼，事件一下子在Twitter上瘋傳，成為是日英國新聞業界一大笑話，人人話快啲去買番份珍藏。
網民雖然係調侃的多，也有一兩位語重深長的說，他們唔覺得好好笑，因為咁嘅錯誤，完全反映咗業內困局，編採人手減到無可再減，先至蝦碌成咁！
對《Cambridge News》來說，從來沒有咁多人識，咁算唔算衝出國際呢？
彭瑪莉
marypang2015@gmail.com