田少讚退黨方國珊叻女

【明報專訊】自由黨榮譽主席田北俊喺今屆立法會選舉吐氣揚眉，以3.1萬票重奪新界東嘅議席，而田少噚日就大讚對手、已退出自由黨，今屆以獨立身分出選新界東嘅方國珊（Christine），話佢拎到咁多票（逾2.4萬票）都「好叻女」。


會否邀回巢 睇對方同黨意願

呢排田少成日怨商界無乜後生政治人才，咁又會唔會邀請Christine重返自由黨？田少就話，要睇番對方意願，但話兩邊喺直選碰頭，可能都有「牙齒印」，最終亦要睇黨意願喎。


已請辭自由黨主席嘅劉健儀（Miriam）直選失利，田少又會唔會重新擔任主席一職？田少話心中「極之不願意」，又話「喺自由黨做咗10年主席」，未必要再試。不過，田少補充，對於做番主席，唔敢講「百分之一百不會，因為自由黨到家都未開過會」。


是否代替劉健儀留一線

至於係咪繼續由Miriam做主席，田少就擔心Miriam咁就要時時留喺立法會，運作上會有啲問題。