賣地受限 中山市賣車牌吸億元

【明報專訊】今年以來，小琴成日都見到唔少報道話因為中國要嚴打樓市，地產商唔敢亂買地開發，搞到地方政府賣地收入大減而冇錢。


雖然係咁，其實地方政府都仲有其他途徑搵錢嘅，好似中山市咁，今年淨係拍賣車牌，加加埋埋都賺到成億㗎。


「粵T88888」成交價69.5萬

根據中山市嘅統計，截至9月佢哋舉行咗60次車牌拍賣，拍賣所得總共有1億幾；其中一個車牌「粵T88888」，成交價達到69.5萬元，係目前中山最高價嘅車牌。


咁賣車牌賺到嗰1億元，中山政府又用咗去邊呢？政府果邊就話，啲錢主要用響交通安全基礎設施，同埋道路交通事故社會救助基金開支，用嚟幫助交通意外當中，死傷者同家屬可能需要嘅經濟援助，例如醫療費咁，就可以利用救助基金先行墊支。