券商﹕世盃西國勢奪冠

【明報專訊】世界盃開鑼，各界對於邊個國家會奪冠嘅口水戰亦展開。券商之間各師各法，以自己嘅方法作出預測，各有各理據。意大利聯合信貸銀行（UniCredit Group）亦加入口水戰，佢哋認為，球員身價高低，係反映球員實力嘅最佳指標，西班牙球員總身價高達6.5億元歐元（61億港元），係32隊決賽周隊伍中最高，因此奪冠機會最大。 指球員身價最能反映實力 UniCredit嘅經濟學家Andreas Rees指出，世界盃決賽周隊伍中，西班牙嘅球員總身價高達6.5億歐元，排行最高，其次分別係英格蘭及法國（見圖），而大熱門巴西，則只值約3.5億歐元，排行第四。 Rees話：「球員身價是反映球隊實力的最佳指標，球員身價愈高，反映球技被認為是最佳。」 有啲球隊中，某一、兩位主力球員有超高身價，有任何損失，會對球隊實力帶來很大影響。 Rees指出，喀麥隆、葡萄牙及阿根廷嘅球隊總身價，最受其主力球員影響，喀麥隆如果冇咗前鋒伊度奧（Samuel Eto'o）、葡萄牙如果冇咗C朗，成隊球隊身價就會減少25％以上；西班牙若冇咗沙維（Xavier Hernandez），球隊總身價減少10％；德國隊長波歷克（Michael Ballack）受傷缺席本屆比賽，令德國身價減少6.4％。 主力球員影響身價 順帶一提，UniCredit所計算出的排名與國際足協的績分所顯示的有所不同，據國際足協績分，西班牙排名則在巴西之後。 其實，之前亦有唔少券商發出報告，貼邊隊最有冠軍相，例如瑞銀及高盛就估巴西，而摩根大通就估英格蘭，大家不妨睇睇邊間券商最有眼光。 報料電郵﹕piano@mingpao.com