最賣座阿凡達 尖沙嘴誕生

【明報專訊】電影《阿凡達》成功創造全球最高票房紀綠，而《阿凡達》IMAX 3D版嘅全球票房冠軍，就喺香港誕生。位於尖沙嘴iSQUARE商場（前身係凱悅酒店）嘅UA iSQUARE IMAX影院，上映《阿凡達》IMAX 3D版4個多月，總入場人次為19.4萬，平均入座率高達87%，票房總收入為3070萬元，成為《阿凡達》全球票房收入最高嘅IMAX影院（見表）。 全港最大銀幕 午夜場都爆 UA iSQUARE IMAX影院，2009年12月17日即《阿凡達》開畫日才開幕， 而且只提供380個IMAX 3D版座位。雖然座位唔多，而且票價高達160、170蚊左右，比起一般數碼3D版票價100蚊至150蚊為高，但以全港最大銀幕（高11.8米×闊21.3米）做賣點，仍吸引到好多人去睇，故此票房先至可以咁勁。據講，《阿凡達》IMAX 3D版上映首2個多月，幾乎場場爆滿，包括凌晨3時特別午夜場！ UA iSQUARE IMAX 影院上映《阿凡達》4個多月嘅票房總收入為3070萬元，佔香港票房總收入17.2%，刷新單一影院最高票房紀錄，以及香港最高電影票房紀錄；連同UA MegaBox IMAX影院，香港嘅兩間IMAX影院上映《阿凡達》嘅票房總收入高達3933萬元，佔香港票房總收入22%。UA MegaBox IMAX影院入座率更高達94%。IMAX影院係3D電影科技嘅領導者，影響力不容忽視。 報料電郵﹕piano@mingpao.com