陳南祿離職冇搞派對

【明報專訊】噚日係陳南祿出任國泰（0293）副主席兼非常務董事嘅最後一日。小琴八卦咁問國泰中人，噚日公司有冇搞吓派對，送一送陳生？原來由於陳生有好多假期要清，故此早前已經放緊假，陳生唔喺公司，所以大型嘅派對就搞唔到喇。陳南祿離開國泰之後，會加盟恒隆地產（0101），7月15日上任。 國泰包偉霆獲委董事 另外，國泰噚日又宣布董事局人事變動，邵世昌由常務董事調任為非常務董事，而包偉霆獲委任為常務董事。現年55歲嘅邵世昌，1978年加入公司，08年10月出任常務董事。現年50歲包偉霆，1982年加入英國太古集團，2000年獲委任國泰營業及市務董事，今年7月獲委任為企業發展董事，並為港龍航空及華民航空董事。包偉霆年薪連同各項津貼為394萬港元，並可收取按表現酌情發放嘅花紅。