亞視準股東黃炳均未現身

【明報專訊】究竟亞視家由邊個話事？內地商人王征話入股，又未完成手續，轉吓頭又搵咗昌興國際（0803）主席黃炳均做亞視股東，等緊廣管局審批。噚日昌興國際開股東大會，小琴諗住有機會見到黃主席，問吓佢對電視行業嘅睇法，但係佢冇出席會議，連昌興其他管理層都冇露面。亞視仲特別派咗隊攝影隊，諗住訪問呢位未來老細，不過都冇特別優待，一齊撲空。亞視嘅免費電視台牌照，係由政府批出先可以經營，你同我作為觀眾都受到影響。究竟黃炳均對亞視未來發展有咩睇法？呢個唔止係向股東交代，仲要向全港市民交代。大家仲未知道黃主席嘅營商手法如何，但由佢公司一張員工通告睇到，公司有一套嚴格制度。通告話，發現員工近期遲到嚴重，所以提醒員工返工時間由早上9至6時，每個月遲到或早退超過5次，便發警告信。唔舒服或急事而遲到、早退，應即時通知上司以獲得到批准。