陳南祿喺恒隆從頭學起

【明報專訊】由太古集團（0019）過檔到恒隆集團（0010）及恒隆地產（0101）嘅陳南祿，噚日正式返工，佢擔任恒隆兩間上市公司嘅董事總經理。菲臘陳話返工第一日，首先要認識吓同事、工作，樣樣嘢要從頭學起。恒隆搞開地產，佢嘅工作當然離唔開地產項目。至於佢有冇新任務，佢話暫時未知，家先要掌握好現時工作。菲臘喺太古集團做咗33年，同好多同事合作過。但菲臘離職前休假，有啲太古員工想同佢食餐飯歡送佢，都未有機會。菲臘噚日都話，休假期間都好忙，所以好多餐歡送飯仲未食，家要慢慢食。新書未推出 先賣廣告菲臘話遲啲會出版一本新書，講佢旅遊中東嘅見聞。佢話唔知趕唔趕得切，喺下星期嘅書展推出，但就賣定廣告話本書啲內容好有趣，小琴一定會捧場。話時話，菲臘做國泰時講旅遊，計計埋埋，都出咗3本書，關於佢派駐海外同公餘旅遊嘅見聞經歷。唔知佢做恒隆之後，又會唔會寫番本關於地產嘅書呢？佢話暫時唔諗咁多，先做好呢份工。恒隆喺內地有唔少樓盤，菲臘話都有機會要飛來飛去，但仍然主力留喺香港。今年4月恒隆公布菲臘過檔嘅消息時，恒隆董事長陳啟宗大讚陳南祿聰明，相信佢要重新學地產工作並唔困難。講開又講，菲臘份新工有新嘢學，而且加咗人工，加盟恒隆首年的薪酬連花紅，至少有2620萬元，比太古09年年薪多八成，相信令好多打工仔羨慕到死。報料電郵﹕piano@mingpao.com