3香港 數碼通 iPad月費鬥神秘

【明報專訊】近期手機用戶都留意緊香港邊間電訊商，會率先出行貨iPhone4，望到望穿秋水。不過，和記電訊（0215）旗下3香港，及數碼通（0315）在出iPhone4前，分別又發聲明話，要出iPad上網月費計劃。之但係，兩家電訊商都神神秘秘，話會幾星期內會推出，但又唔講月費計劃詳情。本來呢兩家電訊商要爭先出月費計劃，唔係一件奇怪嘅事。不過，3香港內容主管何偉榮上個月話，搞iPad上網月費計劃，無咩吸引力，亦無咩興趣賣iPad。數碼通行政總裁黎大鈞早前亦話，對iPad月費計劃有保留。點知，前日數碼通率先發聲明話，要推出為iPad而設嘅數據計劃，噚日3香港立刻宣布，獲蘋果公司正式授權，為客戶提供專為iPad而設嘅月費計劃，仲話推出電子書服務配合iPad。小琴覺得好奇怪，點解兩家電訊公司唔嫁又嫁，唔通瘦田無人耕，耕開有人爭，定係兩家公司整色整水，打心理戰呢？