匯豐下周一展覽講歷史

【明報專訊】中環其中一個重要地標，莫過於匯豐總行，原來佢喺家嘅位置屹立咗四分一個世紀，為慶祝總行25周年紀念，匯豐由下星期一至8月20日舉辦展覽，詳細同大家講講匯豐總行嘅歷史喎！為隆重其事，匯豐下周一搵咗重量級人馬，包括匯豐香港區總裁馬凱博、匯豐銀行前主席施德論（John Strickland）為展覽舉行揭幕儀式，真係令小琴好期待。展覽包括一系列珍貴相片、大廈資料同設計特色等等，不過可惜嘅係，大廈原設計師Norman Foster唔能夠出席揭幕禮，只能派佢公司合伙人出席。1979年拍板興建 耗資逾50億原來呢棟位於皇后大道中1號嘅匯豐總行大廈，已經係匯豐喺香港嘅第4棟總行大樓，喺1979年拍板興建，耗資超過50億港元，家50億起樓當然係濕濕碎，但以當年物價水平，呢棟大樓堪稱可能係全球最貴嘅獨立建築物，十分威水。配件來自英美日 牆壁地板可組合匯豐總部望住成個維港無遮無擋，認真係無敵景觀，成棟建築用上鋼鐵結構，最特別之處係佢嘅配件簡直係國際性大製作：結構用鋼件喺英國造，玻璃、鋁製外殼同地板美國造，服務設施組件日本製造。當年佢被英國《泰晤士報》列為1980年代最具代表性嘅世界十大建築物之一，可想而知佢嘅巴閉史係幾咁堅呢！呢座劃時代嘅建築物，到家依然別具風格，唔會覺得佢out，唔止外形夠型，原來佢裏頭都夠晒實用。好似成座用晒落地玻璃滲透自然光，夠晒環保。聽講入面辦公室牆壁、地板都係可以郁動嘅，如果嫌間房唔夠大，只需要一個周末拆拆砌砌，放假返嚟自然有間大房坐。報料電郵﹕piano@mingpao.com